Conferencia d’Ástur Paredes sobre l’horru en Bimenes

L’horru asturianu, iconu del país, asitiáu aparentemente fuera del tiempu pa munchos, tuvo sometíu al dir y venir de la modernidá. Sobre los sos lliños y cureñes guarda’l reflexu llonxanu de los grandes movimientos artísticos que ximelgaron Europa dende la Edá Media: románicu, clasicismu purista, barrocu, pintoresquismu… elementos d’estilu qu’apaecen entemecíos discretamente con una iconografía ancestral qu’al traviés d’esquemes máxicos que paecen venir de la Edá del Fierro faen por esplicar el funcionamientu del mundu. Mandales qu’atrapen les fuercies de bien pa protexer “l’arca sagrada del pan”, salvaguardando la collecha y garantizando la continuidá de la comunidá campesina. Aparte d’esta funcionalidá esencial, mayestros carpinteros y élites rurales, artesanos y veceros, axuntaron voluntaes creando conxuntos decorativos d’un atractivu estéticu bien grande pa –como en cualesquiera de les artes- buscar l’harmonía, disfrutar de lo guapo y trescender la so memoria.

Esti ye un resume de la conferencia que’l próximu 8 de mayu va dar en Bimenes l’espertu n’arquiteutura tradicional Ástur Paredes. L’actividá, cofinanciada pola Conseyería de Cultura, Política Llingüística y Turismu al traviés del programa “Asturies, cultura en rede” ta organizada pol Ayuntamientu Bimenes con motivu de la XLII Selmana de les Lletres Asturianes.