Monólogo de Cellero en Cabranes

Actuación de Carlos Alba “Cellero”. LA TALLA 38… O FUERA LOS GRILLETES DE LES FAÑAGÜETES

Duración: 75 minutos

Domingo 9 – 18:00 h.

Cellero y los sos collacios echen el tiempu en chigre recordando vieyes glories, esbabayando y tomando pintes. Pero dende´l 8 de marzu dalgo cambia nes sos vides: les muyeres, qu´anantes quedaben en casa, échense al monte. Guiaos por Andrea, la nieta Manolín, les muyeres y los pensionaos de la parroquia van armala, poniendo´n dificultaes a les autoridaes y al poder financieru.

“La talla 38 o fuera los grilletes de les fañagüetes” ye, de momentu, el monólogu mas actual de Cellero. Ambientáu nos alredores de la güelga feminista del 8 de marzu de 2018, ye un intento d´espeyar, partiendo de la comedia popular y del monólogu asturianu, los esmolimientos y lluches de los movimientos sociales, en concreto de los dos que mas tan faciendo por destacar nos caberos tiempos: el feminista y el de pensionaos. Fáense también delles referencies a lo que representó´l movimientu del 15-M, tamién al timu de les preferentes que tanto afeutó a les persones mayores, y a les rellaciones familiares en xeneral.

Con esti monólogu, Cellero recupera la sienda de les histories llargues ambientaes n´Asturies y na España contemporánees que ya entamara con “¡Sporting! (sobre´l subcampeonatu del Sporting en 1978 y l´ambiente de la transición), “A pañar fuel” (sobre les marees de galipote), “De brigada pa Irak” (sobre la guerra d´Irak del 2004), “Va cuatro díes” (sobre los atentaos del 11-M), “Alonsomanía” (sobre los campeonatos del mundu de Fernando Alonso) o “La llei del cuchu” (sobre les furacones de represaliaos del franquismu). Dalgunos d´estos monólogos tan recoyíos nel llibru “Del chigre”, editáu por Trabe.

Y también… TONADA