NUEVOS TALLERES PRÁCTICOS D’AFONDAMIENTU LLINGÜÍSTICU DEL SERVICIU DE NORMALIZACIÓN LLINGÜÍSTICA MAN.CO.SI

El Serviciu de Normalización Llingüística de la Comarca de la Sidra convoca pa esti primer semestre del añu dos nuevos talleres d’afondamientu llingüísticu en Nava y Villaviciosa.

• El primer d’ellos, Taller d’asturianu oral en Nava, impartiráse nel aula de servicios sociales, na cai Luis Armiñán 6, los martes de 18:00 a 20:00, en sesiones quincenales dende’l 4 de febreru al 20 de mayu, y va tar dedicáu a la espresión falada y la conversación, permitiendo a les persones participantes meyorar dende una perspectiva lúdica les habilidaes espresives y arriquecer el vocabulariu sobre les más diverses temátiques.
• Pela so parte, en Villaviciosa vuelve a convocase un añu más el Taller d’escritura creativa y práctica en Villaviciosa, centráu na espresión escrita y na creatividá lliteraria na llingua de Marirreguera, destináu a persones que, aparte de disfrutar de la lliteratura y la escritura, tengan interés en meyorar el so nivel llingüísticu y ortográficu. Esti taller d’escritura n’asturianu va tener llugar na Casa de Los Hevia de Villaviciosa, col mesmu horariu que’l de Nava, de 18:00 a 20:00, en martes alternos, dende el 11 de febreru al 27 de mayu nesti casu.

La inscripción nos talleres ye dafechu de baldre y pue realizase contactando col Serviciu de Normalización Llingüística de la Comarca de La Sidra a traviés del corréu normastur@lacomarcadelasidra.com o, n’horariu de mañanes, pel teléfonu 985 71 84 13.