Servicio de Juventud de la Comarca de la Sidra Comarca Joven 
La escritora Montserrat Garnacho Escayo (Mieres, 1952) foi la ganadora del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu ventiséis. El primer premiu, dotáu con 700 euros, foi pa la so obra “Mira, Maruxina”. El segundu premiu, dotáu con 525 euros, llevólu’l cuentu “Tierra adientro”, de Javier Cayado Valdés (Rales, Villaviciosa, 1987), y Xosé Inaciu Pidal Montes (El Fadiillu, Bimenes, 1970) algamó’l tercer premiu, al que se-y apurren 300 euros, con “Les puntes”. Nesta edición el xuráu tuvo compuestu polos escritores Xulio Vixil Castañón, Pablo Rodríguez Medina y Miguel Rodríguez Monteavaro. Nes próximes selmanes l’Ayuntamientu Bimenes dará anuncia de la fecha d’entrega de los premios, actu nel que l’autora mierense fadrá llectura pública del cuentu ganador.
Montse Garnacho ye llicenciada en Filoloxía Románica pola Universidá d’Uviéu y foi profesora de Llingua y Lliteratura hasta que se xubiló. Ye autora de numberosos trabayos d’investigación lliteraria y etnográfica (en castellanu y asturianu), asoleyaos en llibros, periódicos y revistes. Polos que fueron saliendo ente 1993 y 1996 nel diariu La Nueva España col títulu “Caleyes con oficiu”, l’Asociación d’Escritores en Llingua Asturiana concedió-y en 1995 el Premiu al meyor trabayu periodísticu del añu. Ye autora de más d’una docena de llibros, pente ellos “Hombres y Carbón”; “Mujeres Mineras”; “Donde la culebra canta”; “Y nun ye picardía…”. Ye autora tamién de munchos rellatos curtios y obres de teatru infantil y xuvenil (“Maruxes y Xuanes”; “Cuando se presenta la ocasión”; “A Pespunte”…) que tamién recibieron importantes premios: el Vital Aza, el María Josefa Canellada, el Manuel Nevado Madrid, el Valentín Palacio, el Dolores Fernández Lema y un segundu premiu nesti mesmu certame, el Concursu de Cuentos pola Oficialidá del Asturianu de Bimenes, en 2016, pente otros.
