TEATRU EN BIMENES: FAME

El vienres 21 de febreru, de magar les 19’30 hores, la Casa Cultura de Bimenes, allugada en Santuyano / San Julián, va acoyer la representación de la obra de teatru FAME, al cargu de “Espectáculos Arlequina & La Líquida Teatro”. L’actuación, que ta financiada pola Conseyería Cultura, Política Llingüística y Deporte al traviés del so programa “Asturies, Cultura en Rede”, amiesta’l monólogu humorísticu de David García-Intriago cola música de Santiago Vockram al violín.

SINOPSIS: FAME ye una sorprendente y prestosa propuesta multidisciplinar de teatru sobre’l Sieglu d’Oru, música barroca en direuto y gastronomía cervantina basada nes necesidaes más primitives del ser humanu y na más afamiada de les noveles: El Quixote. Protagonizada por un cómicu contemporáneu pero a imaxe d’aquellos que facíen rir y pensar nos corrales de comedies demientres el públicu comía y bebía. Música, teatru y gastronomía pa enllenar espíritus, estómagos y conciencies. Un maraviyosu viaxe cargáu d’humor pa confirmar eso de que la risa ye l’alimentu del alma y que la cultura ye lo único que mos pue salvar.