REPRESENTACIÓN DE «TÍA MISERIA» EN BIMENES. “¡Rodando! Esnidien les histories”

La productora Covenant Audiovisuales y l’actor Carlos Alba “Cellero” escoyeron el Conceyu Bimenes como ún de los llugares onde van a desendolcar el proyeutu multiplataforma rural “¡Rodando! Esnidien les histories”, al traviés del que quieren amosar el desenrollu de l’actividá cultural en dellos puntos del territoriu asturianu. Ún de los pegollos del proyeutu ye la representación de “Tía Miseria”, espectáculu escénicu empobináu a tolos públicos qu’axunta teatru, música y narración oral, el sábadu 7 d’ochobre, de magar les 18’00 hores, delantre del Polideportivu Municipal “Melanio Asensio”, allugáu en Santuyano / San Julián (en casu de que llueva, tendrá llugar dientro del equipamientu deportivu).

Un viaxe únicu pa esplorar la Cultura nel mediu rural asturianu: Artes escéniques, música, tradición oral, un webdoc y una plataforma web ‘¡Rodando! Esnidien les Histories’ ye un proyectu multiplataforma centráu en amosar el desenrollu de l’actividá cultural en distintos puntos del territoriu asturianu.
La iniciativa vien de la productora Covenant Audiovisuales y Carlos Alba ‘Cellero’, nuna nueva collaboración que pretende dar visibilidá tanto a los profesionales de les artes escéniques como a les asociaciones culturales y entidaes que trabayen nel mediu rural asturianu.
El puntu d’embarque ye la obra teatral ‘Tía Miseria’ (versión del propiu Carlos Alba, basada nel cuentu popular del mesmu nome, xunto a otres histories y exemplos de tradición oral), que cuenta con les interpretaciones de Carmen Gloria García, Carla Loga y Carlos Alba ‘Cellero’; el músicu Dani G. de la Cuesta, interpretando una selección de cantares tradicionales; y l’etnógrafu, escritor e ilustrador Berto Álvarez Peña, esplicando l’orixe del cuentu (fae casi 8.000 años atrás). Trátase d’una obra que busca la participación del públicu, dirixida a toles edaes: en cada actuación, l’escenariu conviértese nun puntu d’alcuentru onde compartir esperiencies, ampliar conocencies y dar llugar a una de les fontes de sabiduría más importantes: l’intercambiu xeneracional.
Un proyectu innovador, tanto nel so planteamientu como nel so formatu multidisciplinar, interactivu y multiplataforma, destinao al espardimientu cultural y espansión de la cultura asturiana y la tradición oral dende’l territoriu asturianu hasta fuera de les sos fronteres.
Toles fases de creación, preparación y actuaciones van ser recollaes nun webdoc realizáu por Covenant Audiovisuales, cola intención de mostrar el trabayu que desenvuelven los y les profesionales de les artes escéniques, especialmente nel mediu rural; amás, en cada puntu d’esti viaxe, van dase a conocer asociaciones locales comprometíes cola cultura, que trabayen pa dinamizar la localidá y ufiertar un calendariu cultural; y con elles, a les persones pertenecientes a les entidaes locales que trabayen nel ámbitu de la Cultura de caún de les zones.
El webdoc, recogíu nuna plataforma web, va sirvir amás, pa ampliar información tocante a los temes qu’atopen cabida: la identidá cultural asturiana, les lleendes qu’asocíen, los tipos d’obres teatrales y la so relación cola tradición oral. Va tomar especial importancia’l papel de la muyer, tanto nel circuitu profesional de la cultura como nel propiu mediu rural: les actrices Carmen Gloria García y Carla Loga van dar exemplu de lo que supón trabayar na industria cultural, y les distintes asociaciones de caún de los llugares, especialmente les formes por muyeres, van aportar el so puntu de vista.
Toles representaciones van realizase a lo llargo d’este ochobre, y la plataforma va ver la lluz a finales d’esi mesmu mes.

Más información de la obra:
Títulu: Tía Miseria (versión de Carlos Alba ‘Cellero’)
Dirección y guión: Carlos Alba
Repartu: Carmen Gloria García, Carla Loga, Carlos Alba
Música en direuto: Dani G. de la Cuesta
Collaboración especial: Berto Álvarez Peña
Duración: 1 hora

Sinopsis: Atención públicu de la comunidá, que lleguen los cómicos y carguen en llombu una montonera histories, dichos, músiques… que sacaron del pueblu pa devolve-ylu fecho teatru. A cuentu de la Tía Miseria vamos viaxar circularmente ente’l pasáu y el porvenir, ente la infancia, la vieyera, la muerte y el poder. Un mecigayu bien prestosu. Tai sollertes, que vais ver cómo la Tía Miseria foi quien a prevocar la mayor crisis de tola historia de la Humanidá.
Facebook: Rodando – Esnidien les Histories
Instagram y Twitter: @rodandoesnidien