PRESENTACIÓN DEL LLIBRU “A PERDA DO USO DE IDIOMAS IBÉRICOS” EN BIMENES

Esti vienres, 22 de setiembre, a les 19’00 hores nel Salón de Plenos de la Casa Conceyu de Bimenes, allugada en Martimporra, Ánxel Cardín Toraño va presentar el so llibru “A perda do uso de idiomas ibéricos. Caso especial do galego”, nel qu’ufre los datos que se llograron en 1970, por primera vegada de manera científica, sobre l’usu del gallegu y del castellán en toa Galicia. Tamién ta basáu nel so trabayu sociollingüísticu fechu na comarca de Vigo, en 1973, pa conocer dalgunos de los problemes del usu de la llingua llariega en competencia col castellán.

Sicasí, na obra ocúpase tamién de la situación de les llingües penínsulares más amenazaes y los problemes pa la so normalización –vascu, aragonés, aranés, mirandés y asturianu (d’ehí’l so enfotu por presentar esti llibru en Bimenes)–, repasando cómo foi la decadencia del so usu, la situación pela que pasen anguaño y los problemes que tán atopando pa la so normalización.

L’autor, Ánxel Cardín Toraño, ye piloñés (L’Infiestu, 1942) pero lleva cuasi tola so vida profesional en Galicia, exerciendo d’economista y sociólogu. Collaborador en temes demográficos y económicos cola Gran Enciclopedia Galega, hai unos diez años yá publicara “El azabache y su cultura en la Península ibérica”, llibru de referencia nel tema que resume les sos investigaciones sobre esti mineral con gran presencia n’Asturies y na so cultura tradicional y mui venceyáu al Camín de Santiago.