Nueva convocatoria de «CALEYANDO PER NAVA»: Visita al molín de Modesto

El Círculo “Amigos de Nava”, dientro del so programa “Caleyando per Nava”, vuelve a programar la salida que se suspendió yá por dos veces a cuenta del tiempu, nesta ocasión pal domingu 25 de mayu. L’enfotu ye’l de visitar el llamáu molín de Modesto, ún de los pocos, si non l’únicu, que se caltién nunes condiciones afayadices en tol conceyu Nava, y qu’amablemente mos va enseñar el so propietariu actual. La salida va ser dende la Plaza Manuel Uría a les 11’00 hores y vamos pasar per Vegadali y Monga enantes d’aportar a El Rebollal, onde s’alluga’l molín. Tres la visita vamos siguir camín d’El Llendón y averarémonos hasta l’Área Recreativa de Paraes pa comer el “bocata”. Dempués de la xinta tornaremos a Nava pasando per La Bortona, Paraes y Tresniñín. En total la ruta nun tendrá más de 7 km.

Les recomendaciones son les avezaes pa esti tipu d’actividá: llevar agua y comida, palu, calzáu cómodu, gorra y, por si un acasu, chubasqueru… anque en casu de muncha agua habrá que pasar l’actividá pa otru día. Y, como n’anteriores paseos, prestábamos saber más o menos el númberu persones col que podemos contar, polo que ye aconseyable apuntase llamando o unviando un whatsapp al teléfonu 680114090 o escribiendo al corréu electrónicu circuloamigosdenava@gmail.com. ¡Animáivos!.