L’espectáculu de música y baille Tradicionando llega a Bimenes

La Banda Gaites Xiranda y los grupos d’investigación etnográfica y baille tradicional El Ventolín y Fitoria entamen Tradicionando, un viaxe pelos raigaños de la música popular d’Asturies, dende Llanes hasta Ibias pasando pela fastera central y la tierra vaqueira.

Un amiestu de folclor col que s’intenta espeyar, en clave d’espectáculu, la bayura musical d’Asturies dende oriente a occidente, ensin perder la esencia del baille tradicional. Gaites, tambores, curdiones, flautes y panderetes entemécense nel escenariu con voces y bailladores al son de xotes, muñeires y dellos ritmos y sones más.

“Tradicionando” va ponese n’escena’l próximu 16 d’ochobre, sábadu, a partir de les 18:00 hores delantre del Polideportivu Municipal de Bimenes, allugáu en Santuyano. La entrada ye de baldre y llibre –hasta completar l’aforu esistente– y ye d’obligáu cumplimientu acudir con mázcaru.