L’ASTURIANADA YE PRESTOSA: XORNADA SOBRE CANCIÓN ASTURIANA EN BIMENES

Hai unos díes avisábamos de que’l ciclu de conciertos “Música en Casa” acababa, pero que la música na Casa Cultura de Santuyano (Bimenes) siguía. Güei presentamos esta iniciativa de l’Asociación d’Intérpretes de la Canción Asturiana (AICA) que va tener llugar el vienres 29 de mayu de magar les 18’00 hores. Trátase d’una xornada d’iniciación y tresmisión de l’asturianada que consta d’una pequeña charra sobre la historia d’esti xéneru tan nuestru (a cargu d’Iván Rionda), l’alcuentru con una lleenda viva (Mariluz Cristóbal Caunedo) y un bloque técnicu – prácticu que va contar cola participación de dos cantantes (Julio Mallada y Águeda Riera) y un gaiteru acompañante (Fonsu “Les Regueres”). ¿Queréis averavos a la canción asturiana? Pues esti día tenéis una oportunidá mui guapa que podéis aprovechar… ¡animáivos!.