Homenaxe a Luis y Armando Montes en Bimenes

L’Ayuntamientu Bimenes va entamar un homenaxe a los hermanos Luis y Armando Montes Fernández, gaiteru y cantante de tonada respeutivamente, el prósimu sábadu 17 de mayu, de magar les 12’00 hores, en Melendreros (Bimenes). L’actu consistirá nel descubrimientu d’una placa que se va llantar al pie de La Fonte La Pipa, a la salida’l pueblu en direición a Fayacaba. Contaráse con una intervención del Alcalde de Bimenes, Alejandro Canteli Rozada, que tamién entregará un pequeñu detalle a Armando Montes y a la familia de Luis Montes, por desgracia yá desapaecíu en 2013. Amás, nel trescursu del mesmu actuarán una pareya de gaita y tambor del Ensame de Música Tradicional Los Yerbatos y la cantante de tonada Alicia Villanueva Megido, una de les mayores promeses d’esti xéneru. Pondráse-y el ramu al homenaxe con una pequeña espicha.