CONCIERTU DE DEIRA EN BIMENES

El sábadu 29 de marzu, a partir de les 20’00 hores, la Casa Cultura de Santuyano / San Julián, va acoyer un conciertu de Deira, anguaño ún de los meyores grupos de música celta del panorama européu. Tríu formáu en 2019 por Juan Almaraz (vigulín), Salvador Daza (flauta) y Gonzalo Llao (guitarra y bouzouki), en 2022 ganó la “Battle of the folk bands” del Celtic Connections de Glasgow (Escocia), ún los festivales más importantes del mundu nesti xéneru. Nesti conciertu Deira va presentar, amás de dalgún tema nuevu, los que formen parte del so primer discu, “Alba”, asoleyáu en 2023.

Con esti conciertu l’Ayuntamientu Bimenes zarra la so participación na temporada 2024/2025 del programa Dinamiz-ARTJ, promovíu pol Institutu pa la Transición Xusta y CIUDEN – Ciudá de la Enerxía col enfotu de da-y puxu a la cultura nos territorios afeutaos pol pieslle d’esplotaciones mineres y centrales térmiques. Gracies a esti programa nos últimos meses pudimos ver en Bimenes actuaciones teatrales (Palomica Lloca Producciones, Dinamia Teatro y Kamante Teatro), circenses (Circo en la Luna) y musicales (The Duellists, a la que se-y amiesta agora esta de Deira).