ALCUENTRU COL ESCRITOR JOSÉ ÁNGEL GAYOL en BIMENES

El vienres 11 de payares, de magar les 19’00 hores, el Salón d’Actos de la Casa Cultura de Bimenes, allugada en Santuyano, va acoyer un alcuentru lliterariu col escritor José Ángel Gayol, entamáu nel marcu del programa “AUTORES NEL CAMÍN 2022” col que se ta llevando per toa Asturies a los y les ganadores de los premios lliterarios que cada añu convoca la Conseyería Cultura, Política Llingüística y Turismu. Nel casu de Gayol, él foi’l ganador, en 2021, del premiu “Xosefa Xovellanos” de novela cola obra “La cafiante muerte de Nicolai Bostov”, de la que va falar nel alcuentru.

José Ángel Gayol (Mieres, 1977) ye escritor y críticu lliterariu. Llicenciáu en Derechu y n’Antropoloxía Social y Cultural, y Máster n’Historia y Análisis Sociocultural, ye autor d’otres dos noveles, cinco poemarios, trés ensayos y un volume de diarios. Ente los premios que tien ganao, amás del mentáu, destaquen el “Xuan María Acebal” de poesía (“El llibru de les coses misterioses”, 2013) y el “Máximo Fuertes Acevedo” d’ensayu (que llevó en 2015, con “Vértigu. L’atracción del abismu na sociedá contemporánea”, y en 2019, con “El silenciu invisible”). En 2020 ganó, amás, el “XXIII Concursu de Cuentos pola Oficialidá del Asturianu” que convoca’l Conceyu Bimenes.