II Concursu d’Escanciadores de Bimenes

El prósimu sábadu, 4 de xunetu, va tener llugar en Bimenes ún de los eventos más importantes del añu: el II Concursu d’Escanciadores de Bimenes, que se cellebra nel marcu de la XIX Fiesta de la Oficialidá de la Llingua Asturiana. El certame arrancará a les 17’30 hores na pista cubierta del Colexu Públicu Martimporra. Hai diez premios xenerales, consistentes en dineru en metálicu más troféu, y un premiu local, al que tamién se-y apurren perres y troféu. En total, repartiránse 720 € en premios. Les persones interesaes en participar namás que tienen de presentase media hora enantes del entamu na mesa de la organización, asitiada nel mesmu llugar del concursu. Dende l’Ayuntamientu Bimenes queremos dar les gracies a aquelles entidaes qu’andechen con nós pa facer posible qu’una de les prebes del Campeonatu Oficial d’Escanciadores d’Asturies 2015 se cellebre nel nuesu conceyu, que son les que vienen darréu: Caxa Rural d’Asturies, Conseyería d’Agroganadería y Recursos Autóctonos, Ayuntamientos de Sariegu, Colunga y Cabranes, Bar Vigil, Bar Restaurante Casa Manuela y Bar El Llugar. De la mesma manera, queremos agradecer el llabor que fae l’Asociación d’Escanciadores de Sidra y, más concretamente, el coordinador del certame, Enrique Tuya, y el so equipu. ¡Vémonos tomando un culín en Bimenes!.