TEATRU en BIMENES: “La reina de la guapura de Leenane”

El próximu martes 27 d’avientu, de magar les 20’00 hores, la Casa Cultura de Bimenes, sita en Santuyano / San Julián, va acoyer la representación de “La reina la guapura de Leenane”, a cargu de la compañía teatral Nun Tris. La representación forma parte del ciclu “AUTORES NEL CAMÍN 2022”, entamáu pola Conseyería Cultura, Política Llingüística y Turismu, por mor de que la obra foi la ganadora del V Premiu “Nel Amaro” de Teatru Profesional en Llingua Asturiana.

“La reina la guapura de Leenane” ye un drama sobre la soledá, la sinceridá y les relaciones ente les persones y la familia, y qu’amuesa como munches vegaes repitimos los errores y fracasos de los que vinieron primero que nós. Na Irlanda rural de los años 80, contestu de violencia y crisis idiomática y identitaria, Maureen, la protagonista, caltién una relación percomplicada cola madre. Ella tien 40 años y ye virxe; la madre, Meg, ye prácticamente una inválida, anque, según la fía, desaxera los sos problemes. Una invitación pa dir a una fiesta va camudar el destín de dambes. Esta obra estrenóse orixinalmente en Galway (Irlanda) y representóse con éxitu a Londres y Nueva York, onde la producción de Broadway llegó a ganar cuatro premios Tony.

Amás del premiu conseñáu, “La reina de la guapura de Leenane”, llevó tamién dos Premios OH! en 2021: el de meyor interpretación femenina, pa Izar Gayo, y el de meyor escenografía, a cargu de Klára Kónkoly-Thege, artista húngara vecina de Bimenes dende cuantayá.