María Cotiello apregonará la Fiesta de la Oficialidá. Bimenes.

María Cotiello apregonará la Fiesta de la Oficialidá. Bimenes.

El próximu 6 de xunetu l’Ayuntamientu Bimenes entama la XXIII Fiesta de la Oficialidá de la Llingua Asturiana y, nesta ocasión, la persona escoyida pa echar el pregón de la mesma va ser l’actriz María Cotiello.

Nacida en Xixón va 36 años pero criada en Grillero, Santa Cruz de Mieres, nel añu 2001 marcha pa Madrid a estudiar Arte Dramáticu na RESAD, llicenciándose cuatro años dempués. De magar entós trabaya como actriz y tien participao en series como “La República”, “Los Protegidos”, “Hay alguien ahí”, “Bajo Sospecha”, “Seis hermanas” o “Centro médico” y en películes como “Las trece rosas” o “Como la espuma”. También pudimos vela como presentadora del programa “De cai”, na TPA.

Arriendes de la so actividá profesional, María Cotiello tien trabayao abondo pola llingua asturiana. Ye Graduada en Llingua Española (especialidá Asturianu) y foi profesora del cursu “Averamientu al audiovisual asturianu”, dientro la programación de la Universidá Asturiana de Branu (UABRA), nos años 2015 y 2017. Amás, foi collaboradora del selmanariu “Les Noticies” y presentadora de dellos actos venceyaos a la normalización social del asturianu, como’l Día de les Lletres Asturianes en 2013 o la gala del Premiu al Meyor Cantar en 2016, participando tamién nos reivindicativos, como na manifestación convocada pola Xunta pola Defensa de la Llingua Asturiana n’abril de 2018 onde dio llectura al “Manifiestu pola Oficialidá”.

Por toes este razones, pal Ayuntamientu Bimenes ye un arguyu poder tenela equí’l primer sábadu de xunetu, en Martimporra, apregonando la XXIII Fiesta de la Oficialidá de la Llingua Asturiana.

Scroll To Top